طب یونانی

السَّلَامُ عَلَیکُم وَرَحْمَۃُ اللّہِ وَ بَرَکَاتہ کہتے ہیں کہ ضرورت ایجاد کی ماں ہے جب سے حضرت انسان کو خالق حقیقی نے عدم سے وجود بخشا اسکی ضروریات کو بھی رفتہ رفتہ پایہ تکمیل تک پہنچایا یا یوں کہہ لیں کہ جہاں کہیں اور جس طرح انسان کو ضروریات پیش آئیں وہیں اپنے اپنے وسائل عقل و دانش کا استعمال کرتے ہوئے اسکا حل تلاش کیا اور پھر قدرت نے بھی ساتھ دیا یوں مَنْ جَدَّ وَ جَدَ کا مصداق ٹھہرا انہیں ضروریات میں سے ایک ضرورت اسکے بیمار ہونے پر شفا ہے معلوم ہوا کہ علاج معالجہ کی تاریخ اتنی ہی قدیم ہے جتنی انسانیت کی عمر، رفتہ رفتہ دھیرے دھیرے انسان جہاں دیگر ضروریات کو پورا کرنے کیلیے نئے نئے انداز اور راستے تلاش کرتا رہا وہیں اپنی اس حصولِ شفا کیلیے بھی بہت سارے طرق اپنائے یوں بہت سارے طریقہ علاج وجود میں آئے پر شہرت چند ایک کی قسمت میں آئی جن میں سے ایک نام طب یونانی کا ملتا ہے جو آج تک زندہ ہے اور ان شاء اللہ قیامت تک رہے گا اس میں کوئی شک نہیں کہ طب یونانی ہم مسلمانوں کا دیگر علوم و فنون کی طرح ایک قدیم سرمایہ، اور نعمت غیر مترقبہ ہے. اگرچہ اس وقت اسکا نام یونانی ہے پر حقیقت میں یہ طب اسلامی ہے، کئی سوسال قبل از مسیح جادوئی طور پر یا جادو گری کے نام سے موسوم ہونے والی یہ میڈیکل سائنس اپنے عروج پر پہنچنے کو ہی تھی کہ رطب یابس کا مجموعہ بن کر رہ گئی پھر جب یہ یونان سے عرب میں منتقل ہوئی اور مسلمانوں نے دیگر علوم کی طرح اسے بھی حاصل کیا اور اسے اپنی تحقیق و مشاہدات اور تجربات کے بعد خس و خاشاک سے پاک کیا یوں یہ طب اسلامی کہلائی پر عرف عام میں نام اسکا طب یونانی ہی رہا مسلمانوں نے اسے کس طرح اپنایا؟ اور اس میں کیا کیا اجتہاد کیا؟ یہ حاملین فن خوب جانتے ہیں یہاں اسکی تفصیل مشکل ہے مختصر یہ کہ یہ فن ہمارا سرمایہ ہے جسے ہم نے کھو دیا ہے یا کھوتے کھا کھا کر کھوتے جارہے ہیں. آج کی یہ پہلی قسط انہیں مختصر سے الفاظ اور مندرجہ ذیل رباعی کے ساتھ مکمل کرنا چاہونگا قارئین نے اگر چاہا تو مزید کوشش کرونگا سکون نواز فسانہ ہے طب یونانی خود اپنے فن میں یگانہ ہے طب یونانی َزمانے والوں نے دیکھا ہے آزما کے حفیظ علاج درد زمانہ ہے طب یونانی خادم فن حکیم مولوی الیاس 18/9/21